Degmez
Bütin ömür ýygnan malu-döwletiñ,
Gideniñde bir gysym guma degmez,
Bakylyk ýok, bardyr ömür möhletiñ,
Günäler kändir, kimler juma gelmez.
Gazanan abraýyñ, hormatyñ, adyñ,
Döwen bir kiçijek göwnüñe degmez,
Duşman kändir, dostlar eşitmez dadyñ,
Ýalan sözleñ beren öwdüñe degmez.
Garry daglar baýyrlara başyny egmez,
Beýiklik pälidir, pese seretmez,
Halal ynsan hiç haramyñ aşyny iýmez,
Diýerlik dälidir, söýse terk etmez.
Dostlar azdyr, duşman daşyñda gurtdyr,
Mertlik bir polatdyr, ownap döwülmez,
Içki arman damagyñda bir ogurtdyr,
Gussa-gamlar şatlyk-şowhuna öwrülmez.
Baýlaryñ bagty garybyñ göz ýaşyna degmez,
Näçe ynsan çäresiz, aýdyr-günleri geçmez,
Näçe gözeller söýeniñ göz-gaşyna degmez,
Ýürekden söýenler özgäni saýlap seçmez.
Çaganyñ gülküsi deý bagtda ýokdur,
Perzent söýmek bagty uly eşretdir,
Deýdiniñ ülkesi şa tagtda ýokdur,
Her bir geçen güni uly hesretdir.
Hiç bir zat ata-ene beren mähire degmez,
Orny dolunmaz giden uly boşlukdyr,
Gadyr bilmez ýetimiñ ahyna degmez,
Ata-eneñli her gün göwün hoşlukdyr.
Arzuw-umyt ýaşadýandyr her adamy,
Umydy ýok toprakda mazara degmez,
Arzuw-umyt aşdyrýandyr her gadamy,
Umydy ýok toprakda yzlara degmez,
Nebsini bilmedik doýmany bilmez,
Açlyk dok sözüniñ harpyna degmez,
Nokady bilmedik goýmany bilmez,
Käbir sözler birje pähime degmez.
21.05.2023.ýyl
Sagat: 05:22
Garlyýew Akmyrat Şyhmuradowiç